Clarin PNP Comelec Checkpoint nakadakop ug tulo ka mga suspetsado sa Illegal nga Druga…
CLARIN, MISAMIS OCCIDENTAL – Human nga gipanghingusgan sa Clarin
Municipal Police Station ang kampanya aron masiguro ang umaabot nga National
and Local Election padayon kini nga nagpatuman sa PNP-COMELEC Checkpoint aron
sa pagpatuman usab sa Gun Ban, apan ning nakalabay nga adlaw nga Biernes
(January 21) mga nagpayuhot sa illegal nga druga ang nadakpan sa maong
checkpoint nga gimontar sa National Highway, Poblacion 2, Clarin, Misamis
Occidental.
Nasayran gikan kang Police
Senior Inspector Richel Sumagang, kasamtangan nga Hepe sa kapolisan sa lungsod
sa Clarin, nadakpan alas dose sa tungang gabie si Mark Anthony Potayre y
Gulang, 27 anyos gradwado sa kolehiyo, ug nagpuyo sa Purok 2, Dalisay,
Oroquieta City nga sakay sa usa ka Rural Transit Bus padulong na sa Oroquieta
City ug nakpmpiska sa suspetsado ang usa (1) ka Rectangular nga Sachet diin
adunay sulod nga usa (1) ka plastic sachet sa maong illegal nga druga diin
gibanban nga adunay street value nga P1,000 ug upat (4) ka mga aluminum foil
strips, duha(2) ka disposable lighter.
Insakto alas dose y media sa
mao gihapon nga gabie, lain na usab nga suspetsado ang nasakote sa Clarin MPS
pinaagi gihapon sa maong PNP-COMELEC Checkpoint diin naila ang suspetsado nga
si Pedrito Ellis Jr y Lim, 25 anyos, ug residente gihapon sa Purok 2, Barangay
Paypayan sa syudad sa Oroquieta ug nakuha gikan sa iyang posesyon usa (1) ka
plastic sachet nga adunay sulod nga walo (8) ka mga gagmay plastic sachet nga
adunay sulod nga illegal nga druga’ng “Shabu” ug upat (4) ka mga aluminum foil
strips.
Dugang pa ni Police Senior
Inspector Sumagang, nga sa pagka Ala Una ang takna sa kaadlawon usa na usab ka
suspetsado ang nadakop ug naila nga si Reyman Zoilon y Salibay, 23 anyos nga
taga Purok 2, Barangay Tipan, syudad sa Oroquieta sakay sa usa ka motorsiklo
Honda XRM nga adunay Plaka NUmero 068 KD ug nakuha gikan sa suspetsado ang usa
(1) ka plastic sachet nga adunay sulod nga napulog lima (15) ka mga gagmay’ng
plastic sachet nga adunay sulod sa gitahapan drug nga “Shabu” ug lima (5) ka
mga aluminum foil strips.
Sa maong panghitabo ug pagkadakop
sa tulo ka mga suspetsado pinaagi sa maong gimontar nga PNP-COMELEC Checkpoint
dali usab nga gidala sa Clarin MPS Station didto sa Clarin aron pagasakaan ug
kasong nakalapas sa R.A. 9165 kun ang balaod-non sa pagpayuhot ug illegal nga
druga. (Misamis Occidental Bureau)