Search alang sa Best Implementing School sa ‘Gulayan sa Paaralan at Tahanan’ project gisugdan sa Tangub

TANGUB CITY, Misamis Occidental, June 11 (PIA) – Ang Search for Best Implementing School sa "Gulayan sa Paaralan at Tahanan" Project alang sa tuig-tingtungha kun School Year (SY) 2014-2015, gisugdan na  sa Tangub.

 

Gitumong kini sa pagpalambo sa estado sa nutrisyon sa mga bata nga kulang sa timbang aron ipadahan ug dungagan ang produksiyon sa mga utanon diha sa mga pampubliko ug pribadong eskwelahan sa elementary ug high school sa siyudad, matud ni Dr. Victoria V. Gazo, superintendent sa Department of Education, Division of Tangub City (DepEd-Tangub).

 

Si Gazo miingon nga gipatuman usab kini isip usa ka lakang aron matubag ang kabalaka diha sa kabataan sa kagutom, kansang pulong nagpasabut sa kahapdos sa tiyan nga bation gumikan sa kakulang sa gikaon ug nahimong porma sa gitawag nga severe food insecurity, nga kung dili maatiman pagdali moresulta ngadto sa kakulang sa nutrisyon o malnutrition.

 

Ang datus sa pagtuon nga gihimo sa Food and Nutrition Research Institute sa Department of Science and Technology (FNRI-DOST) sa tuig 2005, nagpakita niining mosunod:

 

Baynte-singko sa usa ka gatus (25 out of l00) ka mga bata, edad wala pay lima ka tuig ngadto sa lima ka tuig (0-5 yrs. old) kun tulo ka milyon (3M) ka mga bata ang kulang sa timbang alang sa ilang edad.

 

Baynte-tres sa usa ka gatus (23 out of 100) ka mga bata, edad unom ngadto sa napulo ka tuig (6-10 yrs old) kun duha ug tunga ka milyon (2.5M) ka mga bata ang kulang sa timbang sa ilang edad.

 

Traynta e dos sa usa ka gatus (32 out of 100) ka mga bata, unom ngadto sa napulo ka tuig (6-l0 yrs old) kun tulo ug tunga sa milyon (3.5M) ka mga bata ang kulang sa gitas-on kun mugbo'g sukod sa ilang edad.      

 

Samtang si Gazo usab miingon nga ang Search nagtumong sa pagpasaka sa kapabilidad sa mga eskwelahan ug mga komunidad nga magpadaghan sa igong pagkaon nga makasustener sa tibuok tuig nga supplementary feeding program ug ipadahan ang gitawag nga economic productivity, maayong panglawas ug nutrisyon, ingon man, sa kahapsay nga palibut.

 

Gilantaw usab niini ang pagpadugang sa kahibalo, kahanas sa pagsabut sa kamahinungdanon sa paghimo'g mga garden sa eskwelahan ug pagpakita sa ginangmay nga produksiyon sa mga utanon aron mahimong modelo ug sundon aron ipadahan ang gitawag nga family food security.  

 

Dugang katuyoan sa Search mao ang pag-edukar sa mga ginikanan unsaon pagpalambo sa estado sa nutrisyon sa ilang mga anak, paghatag maki-angayon nga relasyon tali sa mga eskwelahan ug komunidad ug pagdala ngadto sa panimalay sa mga nakat-onan sa mga bata gikan sa mga magtutudlo ug eskwelahan. (RCA/PIA10-Misamis Occidental)