Breaking News

Duha ka tawo Naigo sa Liti

Ozamiz City - Managsamang nakaangkon ug sunog sa kalawasan ang duha lalaki human kini naigo sa kilat niadtong Sept 19 sa may alas 6 sa gabie

Sa pakighinabi sa DXDD NEWS sa mga saksi nga dali ra kaayo ang liti mihapak sa usa ka panimalay nga nahimutang sa Brgy. Pulot dakbayan sa Ozamiz

Ang mga biktima naila nga sila si Jongjong Amparado 33 anyos ug lumolupyo sa maong dapit ug ang usa ka  Jomar Mutia 29 anyos nanimuyo usab sa maong brgy.

Saysay pa sa mga saksi niadtong mga higayuna nga human sa kusog nga pagbundak sa ulan kalit lamang nga mipaka ang kusog nga liti ug nakita nila nga mitugpa ang maong liti ngadto sa us aka panimalay nga ginag-iyahan sa pamilyang Amparado

Si Jongjong Amparado niadtong higayuna anaa sa ilang kusina sa dihang kusog nga paka sa liti ang mihapak sa ilang ilawom sa panimalay ug kalit lamang nga adunay pwersa ang milabay kaniya nga nagkalayo resulta nga hapit kini mahagbong sa ilang panimalay nga anaa sa dagat ug misaka pa kini ngadto sa sulod nga bahin sa balay niini nga maoy hinungdan sa pagkatadtad sa ilang cabinet nga ginama sa kahoy

Giguba usab sa liti ang plangka sa ilang panimalay ug migawas agi sa ilang salog padulong sa haligi nga maoy hinungdan sa pagkatadtad usab niini

Sunog sa kalawasan ang naangkon sa biktimang si Jongjong lakip na ang sapot sa biktima

Suerte usab nga wala’y naigo sa usa sa mga anak ni Jong-jong nga anaa sulod sa ilang panimalay

Pipila ka metros ang gilay-on gikan sa nahimutangan sa banayng Amparado, nalabyan usab sa liti ang usa ka mangisngisda nga si Jomar Mutia nga padulong unta kini sa ilang sakayan sa dihang nakita sa iyang asawa nga kusog nga liti ang nagpadulong sa iyang bana

Pahayag ni Jomar nga nawad-an kini sa panimuot gumikan sa  hitabo sa kakusog sa kuryente nga iyang naangkon sa kilat ug didto na sa tambalanan kini nakabati ug panimuot ug nagpit-os sa kasakit nga ilang naangkon

Suerte lang nga adunay nakakita sa mangingisda sa dihang naigo kini sa kilat

Managsamang anaa karon ang duha ka biktima sa liti sa Misamis University Medical Center.//ManuelRonquillo,Jr