AGOSTO 12, 2021 – HUWEBES Ika Napulog-Siyam nga Semana Sulod sa Tuig

 MGA PAGBASA

ANG PAGBASA GIKAN SA BASAHON NI JOSUE (Jos. 3: 7-10, 11, 13-17)

Unya ang GINOO miingon kang Josue, “Tungod sa buhaton ko karong adlawa ang tanang katawhan sa Israel magpasidungog kanimo nga usa ka dakong tawo, ug masayod sila nga nag-uban ako kanimo ingon nga nag-uban ako kang Moises. Sugoa ang mga pari nga nagyayong sa Sudlanan sa Kasabotan nga mohunong sila inigtunob nila sa tubig sa suba.”

Unya si Josue miingon sa katawhan, “Dali kamo ngari ug pamati sa isulti sa GINOO nga inyong Dios. Karong adlawa mahibaloan ninyo nga ang buhing Dios nag-uban kaninyo; samtang mosulong kamo abugon niya ang mga Canaanhon, ang mga Hetihanon, ang mga Hebihanon, ang mga Perisihanon, ang mga Gergasihanon, ang mga Amorihanon ug ang mga Jebusihanon. Ang Sudlanan sa Kasabutan sa GINOO sa tibuok kalibutan mouna kaninyo pagtabok sa Jordan. Sa diha nga motunob na sa tubig ang mga pari nga nagyayong sa Sudlanan mohunong pagbaha ang Suba sa Jordan ug ang tubig nga gikan sa ibabaw mopundo sa usa ka dapit.”

Ting-ani kadto ug nagbaha ang suba.

Namiya ang katawhan sa kampo aron pagtabok sa Jordan. Nag-una ang mga pari nga nagyayong sa Sudlanan. Pag-abot nila sa daplin sa Jordan ug sa pagtunob nila sa tubig, mihunong pagbaha ang suba ug mipundo ang tubig sa ibabaw didto sa Adam, ang siyudad duol sa Zaretan. Ang pagbaha sa tubig ngadto sa Patayng Dagat nahunong sa hingpit ug mitabok ang katawhan ngadto sa Jerico. Samtang naglakaw sila sa namala nga yuta, ang mga pari nga nagyayong sa Sudlanan nagtindog sa malang yuta taliwala sa Jordan, hangtod nakatabok ang tanang katawhan.

ANG PULONG SA GINOO.

SALAMAT SA DIOS.

SALMO RESPONSORYO

(Ps. 114: 1-2, 3-4, 5-6)

T. Aleluya.

Sa paggula ni Israel gikan sa Ehipto, sa balay ni Jacob gikan sa usa ka katawhan nga laig sinultihan, ang Judah nahimong iyang santuwariyo, ang Israel iyang gingharian.

T. Aleluya.

Ang dagat nakakita ug midagan; ang Jordan misibog. Ang mga bukid nanglukso ingog mga karnero, ang mga bungtod ingog mga nating karnero sa panon.

T. Aleluya.

Ngano, O dagat, nga midagan ka? O Jordan, nganong misibog ka? Kamong mga bukid, nganong naglukso kamo samag mga karnero? Kamong mga bungtod, sama sa mga nating karnero sa panon?

T. Aleluya.

ALELUYA (Ps. 119:135)

T. Aleluya.

Ipadan-ag ang imong nawong ngari sa imong sulugoon, ug tudloi ako sa imong mga balaod.

T. Aleluya.

ANG PAGBASA

GIKAN SA EBANGHELYO SUMALA NI SAN MATEO (Mt. 18:21-19:1)

Unya miduol si Pedro kang Jesus ug nangutana, “Ginoo, makapila ba makasala kanako ang akong isigkatawo ug ako gihapon siyang pasayluon? Makapito ba?”

Si Jesus mitubag, “Dili kay makapito ra, kondili kapitoan ka pito. Kay ang Gingharian sa langit sama man sa usa ka hari nga nakighusay sa mga utang sa iyang mga sulugoon. Sa diha nga nagsugod siya paghusay, gidala ngadto kaniya ang usa ka sulugoon nga nakautang kaniyag milyon ka pesos. Ug tungod kay wala man siyay igong ikabayad sa iyang utang, misugo ang iyang agalon nga ibaligya siya ingon nga usa ka ulipon, lakip ang iyang asawa ug ang iyang mga anak ug ang tanan nga iyaha, aron makabayad siya sa utang. Miluhod ang sulugoon atubangan sa iyang agalon, ug nagpakiluoy nga nag-ingon, ‘Sir, ayaw intawon ako apikiha, kay bayran ko ra ikaw sa tanan! Naluoy kaniya ang agalon, busa gipapas niya ang utang sa sulugoon ug iyang gipalakaw.”

“Milakaw ang tawo ug gikasugat niya ang usa sa iyang mga kaubang sulugoon nga nakautang kaniyag pipila lamang ka pesos. Gilabni dayon niya ug gituok, ug giingnan, ‘Bayri na ko sa imong utang! Ang iyang kaubang sulugoon miluhod ug nagpakiluoy kaniya sa pag-ingon, ‘Ayaw intawon ako apikiha kay bayran ko ra ikaw! Apan wala siya mosugot; hinonoa, gipapriso niya hangtod nga makabayad sa utang. Sa pagpakita sa ubang sulugoon sa nahitabo, nasubo sila pag-ayo, ug nagadto sila sa ilang agalon ug siya gisuginlan nila sa tanan. Busa gipatawag sa agalon ang sulugoon ug giingnan, ‘Banyaga ka! Gipapas ko ang tanan mong utang kay nagpakiluoy ka man kanako. Angay ka untang maluoy sa imong isigkasulugoon, ingon nga ako naluoy kanimo,’ Nasuko pag-ayo ang agalon, ug gipapriso niya ang sulugoon aron silotan hangtod nga makabayad siya sa tanang utang.”

Ug gitapos ni Jesus ang sambingay sa pag-ingon, “Ingon usab niana ang buhaton kaninyo sa akong Amahan nga atua sa langit kondili kamo mopasaylo sa inyong isigkatawo sa kinasingkasing gayod.”

Tapos si Jesus makasulti niining mga butanga, mibiya siya sa Galilea ug miadto sa Judea, tabok sa Suba sa Jordan.

ANG EBANGHELYO SA GINOO.

DAYGON IKAW, O CRISTO.